【甜粅粅的一冬】

就欲到 2019 年，閣來差不多一個月嘛欲舊曆過年，明年就是豬年，祝逐家有「甜粅粅的一冬」～

註：
甜粅粅（tinn-but-but）：形容非常甜。

【芋仔紙】 

「衛生紙」的台語欲按怎講？
會使直翻，嘛有其他講法，譬喻講佇便所用的，就號做「便所紙」，嘛人講「粗紙」，阮家己上佮意的是「芋仔紙」，因為是「種芋仔」所使用的紙，就叫做「芋仔紙」。以前學生時代，逐家就是按呢講～
另外，閣有人講「綿仔紙」，但除了表示是「便所紙」以外，有的人嘛會將伊當做是「面紙」。講到這，阮家己私底下是創作一个新詞，叫「蘋果紙」，一方面是呼應「衛生紙—芋仔紙」，另外一方面是「面紙」較幼，可能是用來拭面、拭目鏡，就親像蘋果表面，遐呢光滑，而且嘛會使想著「蘋果肌」，所以阮私底下攏慣勢將「面紙」叫做「蘋果紙」，嘛較古錐...

【赤赤 ＆ 傷烙】 

台南人上愛食虱目魚，假日煎虱目魚的時陣，煎了毋是蓋理想，哈哈...拄好想起這兩个詞—赤赤、傷烙。
魚皮煎甲金噹噹、赤赤赤，食起來就會足酥足紲喙。若煎甲小可臭火焦、按呢就是「傷烙」矣。
煎魚仔閣誠有學問呢...

【貓貓相】

以前較捷聽講「金金相」，最近聽序大講著「貓貓相」，感覺非常古錐，這應該是今年咱分享著上古錐个詞～
阮兜彼隻巴哥「liōr-tòr」，若看咱食物件，目睭就會「貓貓相」。又閣譬如這幅圖用曖昧圖形个方式，將伊和兔仔畫做伙、鬥成一隻貓仔頭，逐家來貓貓相看覓，攏總有幾隻狗仔、兔仔～

【饞食】
 
阮兜彼隻巴哥「liōr-tòr」逐擺食物件攏足雄，尤其是見擺若食林菝仔，袂輸咧枵幾若工，實在是有夠饞食。所以厝內人嘛會叫伊「饞食liōr」，伊若有手，應該是會將林菝仔扲牢牢。
以前細漢聽人講「饞食鬼」，攏想講是「屎食鬼」，枵甲啥物攏食按呢，後來才知是「饞食」，實在是誤會真大呢～