「尬聊」个台語按怎講？應該會使講是「虐講」喔！
先講著「尬聊」，其實頭一擺聽著，想講和較車（kà-tshia）理路仝款，掠準是直直講攏講袂煞、足有話通講，結果竟然是完全顛倒反，是「尷尬聊天」簡稱「尬聊」。
「尷尬聊天」台語是「礙虐開講」，簡稱就是「虐講」，音和「羊羹」欲仝欲仝，羊羹台語受著日語影響讀yookan，按呢想起來感覺誠順，譬如講：「食彼頓飯，食甲逐家攏變成yookan矣。」抑是直接鬥「虐講」嘛有通：「唉、閣欲去『虐講』矣，真正足無想欲去食彼頓飯。」
羊羹特性結規塊，親像無話通講時，空氣嘛結做伙；羊羹啖糝一下會使，袂做正頓，就親像雙方無話通講只是烏白揣話題爾爾，袂真正深入講啥物正經代。
以上分享予逐家～ 🤓

「奢華」、「奢侈品」个台語欲按怎講？會使講是奢華品、虛華物仔喔！
奢華（tshia-hua）、虛華（hi-hua）攏是原本就有个講法，苦勸人毋通傷過頭匪類，所以奢華品、虛華物仔兩種講法攏有通。阮是感覺，若是產品有時陣會使用「奢華品」（tshia-hua-phín）來形容，但若欲形容較討債、無應該烏白浪費錢買物件，就會使用「虛華物仔」較合。
另外，嘛有人講是冗剩品、冗剩物仔，冗剩（liōng-siōng）就是加出來个物件，按呢想應該嘛有通... 逐家感覺呢？🤔

 

【舒適圈的台語 — 舒步箍仔】
「舒適圈」个台語按怎講？凡勢會使講是「舒步箍仔」喔！
舒步，本身就有過傷爽个意思，就是比四序（sù-sī）閣較放輕鬆，一般就會用舒步來形容。所以「舒適圈」，阮講應該會使講是「舒步箍仔」，講起來誠順、嘛有通。
毋知逐家感覺按怎？🤔

【路癡的台語 — 揣路雞】
「路癡」个台語按怎講？ 若是直翻，就是「方向感無好个人」，但是按呢只是一句形容，毋是名號。所以阮就想著，台灣結婚禮俗會出現个「𤆬路雞」（tshuā-lōo-ke），若是講伊會使做引路者，按呢相對伊个「路癡」，應該就會使講是「揣路雞」（tshuē-lōo-ke），譬如講：「你真正是一个揣路雞，方向感實在有夠歹。」所以「迷路」嘛會使講是「揣無路」、「踅無路」。 當然，這是阮家己討論了後，感覺講起來上順，嘛足好記、足古錐个新詞，逐家感覺咧？🤓

【無啥會寒】

昨昏，聽著兩个人對話。
「今仔無啥會寒啦...」
「哪有可能～ 寒甲按呢，閣無啥會寒。」
「著阿！今仔遐寒，所以我講，『無衫』會寒。」
「著啦、著啦！真正是『無衫』會寒啦...無衫就寒害去矣。」
無啥个「啥」嘛會使讀sánn，和「衫」（sann）欲仝音，但「無啥會寒」和「無衫會寒」意思是差真濟。 天氣有影真寒、又閣𫝏（gàn），衫就愛加穿寡～ 😘